Astrid Alexandre

 

In venderdi saira avant memia blers onns er'jau en ina bar. Qua entran els - in chantadur suenter l'auter dal chor renumà Cantus Firmus. Ed els entschaivan a chantar. Jau aud dentant be ina singula vusch. Ina che splendura sur las autras vuschs dals capo chantadurs vi. Durant la saira dumond jau al dirigent Clau Scherrer, tgi che quai saja. "L'Astrid manegias?" respunda el. E dapi lu na hai jau betg pli emblidà quella vusch.

La via d'Astrid Alexandre ha cumenzà sin in auter continent, gea en in senn en in auter mund. Naschida è ella a Port-au-Prince, Haiti, nua che ses bab oriund da la Belgia manava in project linguistic. Sco buoba pitschna è la returnada en Svizra, ha fatg las scolas, gea schizunt da scolasta en il seminari ed è dapi tschintg onns redactura da musica tar Radiotelevisiun Svizra Rumantscha (RTR). Sco dad in auter mund è anc adina sia vusch, ch'ella mussa adina puspè en collavuraziun cun auters chantadurs ed amis musicals sco Mario Pacchioli u Corin Curschellas. Ella ha concertà tant a Domat sco a Paris ed en Babilonia, resp. a Riom per il festival cultural Origen 2012. Ed era sper il palc è ella fitg activa per la musica rumantscha. Per RTR ha ella tranter auter realisà il project «chant au tour» che ha gì in effect incredibel sin l'entira scena da musica rumantscha. Astrid Alexandre ha ina scolaziun classica da chant e clavazin. Plinavant ha ella studegià durant in onn scienzia da musica a l'Universitad da Basilea.

 

Tedlar viaden

JoomSpirit