Tge porscha R-tunes?

R-tunes è punct da servetsch administrativ e porscha accumpagnament artistic per musicistas e musicists rumantschs.

Sco punct da servetsch porscha R-tunes il marketing en il senn stretg - la distribuziun. Chanals tradiziunals sco la vendita en las stizuns dals vitgs, e chanals pli usitads en la branscha, sco la vendita via iTunes, vegnan activads dad R-tunes. Latiers vegnan avertas novas vias da distribuziun sco per exempel la vendita en salons da coiffeurs ed auter pli.
Per il marketing el senn vast da la reclama vegnan activads contacts en ils meds da massa locals, regiunals, naziunals ed internaziunals. Ina preschientscha effectiva en la rait - campagnas da facebook, da video e dad e-mail fa ual uschè part dal marketing sco la posiziun d'artistas ed artists en bloggs e sin plattfurmas sco Mx3. Ina atgna preschientscha en la rait sa chapescha da sasez.

La lavur dificila da l'administraziun e dal fund raising è forsa il pilaster il pli impurtont dad R-tunes. Sco centrala per dumondas a sponsurs po R-tunes nizzegiar diversas sinergias, nua chi vegn da preschent bain enqual giada fatg lavur dubla. Per ils sponsurs daventa R-tunes in partenari reliabel. R-tunes garantescha in product e sia qualitad. Daners n'èn maina à fonds perdu.

Per artistas ed artists davent l'emprim pass ad ina producziun professiunala pli simpel, e per ils sponsurs sa simplifitgescha il contact cun ils auturs - via R-tunes.

R-tunes sco agentura na organisescha betg mo in batten dal disc, mobain era gist ina turnea per sias artistas e ses artists. La finamira è dad era pudair ir cun quella sur cunfin - il cunfin linguistic, dentant betg mo lez.

JoomSpirit